දේශීය පුවත්
මහ ඔය සහ දැදුරු ඔය ආශ්රිතව ගංවතුර අනතුරු ඇඟවීම්
වාරිමාර්ග දෙපාර්තමේන්තුව විසින් මහ ඔය සහ දැදුරු ඔය ද්රෝණි ආශ්රිතව ගංවතුර අනතුරු ඇඟවීමක් නිකුත් කර ඇත. දෙපාර්තමේන්තුව සඳහන් කළේ, මහ ද්රෝණිය හා දැදුරු ඔය ද්රෝණිය ආශ්රිතව ඉතිරි දින කිහිපයේදී පැවති අධික වර්ෂාපතනය හේතුවෙන් මෙම අනතුරු ඇඟවීම නිකුත් කිරීමට සිදුවූ බවය.
ඒ අනුව, මහ ඔය ද්රෝණියේ ඇතැම් ප්රදේශවල දැවැන්ත වර්ෂාපතනයක් පවතින බැවින්, ඉදිරි පැය 36 තුළ අලව්ව, දිවුලපිටිය, මීරිගම, පන්නල, වෙන්නප්පුව, මීගමුව, කටාන සහ දංකොටුව ප්රාදේශීය ලේකම් කොට්ඨාසවලට අයත් පහත්බිම් ප්රදේශවලට ගංවතුර තත්ත්වයක් ඇති විය හැකි බව අනතුරු අඟවා ඇත.
එමෙන්ම, දැදුරු ඔය ද්රෝණියේ ඉහළ හා මධ්ය ප්රදේශවලට පවතින අධික වර්ෂා තත්ත්වය හේතුවෙන්, දැදුරු ඔයේ ජල මට්ටම ද මේ වන විට ගංවතුර මට්ටමට ආසන්න වී ඇති බව වාර්තා වේ.
වාරිමාර්ග දෙපාර්තමේන්තුව පවසන්නේ, දැදුරු ඔය ජලාශයේ පිටවාන් දොරටු විවෘත කර තත්පරයකට ඝණ අඩි 16,250ක් පමණ සීඝ්රතාවයකින් ජලය මුදා හරිමින් පවතින බවය. මේ හේතුවෙන්, ඉදිරියේදී ජලාශයට ලැබෙන වර්ෂාජල ප්රමාණය අනුව තත්ත්වය තවත් අධික විය හැකි බවද එම නිවේදනයේ සඳහන් වේ.
ඒ අනුව, වාරියපොල, නිකවැරටිය, මහව, කොබෙයිගනේ, බිංගිරිය, පල්ලම, හලාවත, ආරච්චිකට්ටුව සහ රස්නායකපුර ප්රාදේශීය ලේකම් කොට්ඨාසවල පහත්බිම් ප්රදේශවලටද ගංවතුර තත්ත්වයක් ඇති විය හැකි බව එම නිවේදනය මගින් අවධාරණය කර ඇත.
වාරිමාර්ග දෙපාර්තමේන්තුව සිය නිවේදනයේ අවසානයේ පෙන්වා දී ඇත්තේ, මෙම ප්රදේශවල පදිංචිකරුවන් හා මාර්ග භාවිතාකරුවන් සියලු දෙනා අවධානයෙන් හා සැලකිල්ලෙන් ක්රියා කරන ලෙසයි.