දේශීය පුවත්
වීගස්ආරේ කජ්ජා ඝාතනය පාතාල ගැටුමකට වඩා ගැඹුරු කුමන්ත්රණයක්
වීගස්ආරේ කජ්ජා ලෙස හැඳින්වෙන අරුණ විදානගමගේ සහ අනෙක් දෙදෙනාට එරෙහිව සිදු වූ ත්රිත්ව ඝාතනය සම්බන්ධයෙන් අපරාධ පරීක්ෂණ දෙපාර්තමේන්තුව ඇතුළු විමර්ශන කණ්ඩායම් නව මාවතක් ඔස්සේ පරීක්ෂණ ආරම්භ කර ඇත. මෙම ඝාතනය හුදු පාතාල ගැටුමක් ලෙස නොව, සංකීර්ණ කුමන්ත්රණයක ප්රතිඵලයක් බවට දැඩි සැකයක් පළවෙයි.
තොරතුරු අනුව, කජ්ජා සහ බැකෝ සමන් අතර ඇතිවූ විරෝධය ආරම්භ වී ඇත්තේ බැකෝ සමන්ට අයත් හෙරොයින් කිලෝග්රෑම් 40ක් ඇඹිලිපිටිය පොලීසිය අත්අඩංගුවට ගැනීමත්, ඒ අතරින් කිලෝග්රෑම් දෙකක් කජ්ජා විසින් පැහැරගත් බවට එල්ල වූ චෝදනාවත් හේතුවෙන්ය.
ඉන් අනතුරුව සිදුවූ ඝාතනය සම්බන්ධයෙන් විමර්ශකයන්ගේ අවධානයට ලක්වී ඇති තවත් කරුණක් වන්නේ වෙඩික්කරුවන්ට කිසිදු මුදලක් ගෙවා නොතිබීමයි. සාමාන්ය කුලී ඝාතනයකට විරුද්ධව මෙය සිදු වී තිබීම, ඝාතනය පිටුපස බලවත් පාර්ශ්වයක බලපෑමක් හෝ තර්ජනයක් තිබිය හැකි බවට සැකයක් ඇති කරයි.
ඝාතනය සිදුවූ අවස්ථාවේදී කජ්ජා තම දරු දෙදෙනා සමඟ සිටියදී බැකෝ සමන් වෙඩි තබන ලෙසට අණ දී ඇති බවත්, එම දරුවන් දෙදෙනා ද ඝාතනය වූ පසු බැකෝ සමන්ගේ බිරිඳ ඔහුට පහර දී නිවසින් පලවා හැර ඇති බවත් විමර්ශනවලදී අනාවරණය වී ඇත.
මෙයට පෙර, 2024 පෙබරවාරි 11 දින මාධ්ය හමුවකදී කජ්ජා විසින් දේශපාලනඥ කපිල දිසානායක සහ රාජපක්ෂ පවුලේ දේශපාලන බලවේගවලින් තම ජීවිතයට තර්ජන එල්ල වී ඇති බව ප්රකාශ කර තිබිණි. එවකට බැකෝ සමන් පිළිබඳ කිසිදු සඳහනක් නොකරමින් ඔහු දේශපාලන පාර්ශ්ව ඉලක්ක කරමින් කළ ප්රකාශ හේතුවෙන් මෙම ඝාතනය එම හෙළිදරව් වළක්වා ගැනීමට අරමුණක් වූවාදැයි සැකය මතු වී ඇත.
ඝාතනයෙන් පසු කජ්ජාගේ පවුලේ සාමාජිකයන් විසින් මාධ්ය වෙත කළ ප්රකාශ එකිනෙකට විරුද්ධ වූ නිසා විමර්ශනවලදී ගැටලුකාරී තත්ත්වයක් උද්භව වී ඇත. විමර්ශන නිලධාරීන් සැක කරනුයේ ඔවුන් යම් තොරතුරු සඟවා සිටින බවයි. විශේෂයෙන්ම, කජ්ජාගේ පවුල් ආරවුල්, බිරිඳට සිදුකළ හිංසනයන් සහ දෙදෙනාටම තිබූ අනියම් සබඳතා පිළිබඳ කරුණුද පරීක්ෂා කෙරේ.
මෙම සිද්ධිය සම්බන්ධයෙන් බැකෝ සමන්ගේ මස්සිනා මයික්රෝ වර්ගයේ ගිනිඅවියක් සමග අත්අඩංගුවට ගෙන ඇති අතර, ඔහුගේ මත්ද්රව්ය ජාවාරම සහ මුදල් විශුද්ධිකරණ ජාලය මෙහෙයවනු ලබන බවටද තොරතුරු ලැබී ඇත.
ඊට අමතරව, කජ්ජාගේ මිතුරෙකු වන සම්පත් මනම්පේරි නමැත්තා ඝාතනය සඳහා යොදාගත් ගිනිඅවිය ප්රවාහනය කිරීමේ සම්බන්ධතාවය පිළිබඳවද විමර්ශන සිදු කෙරේ. ඔහු පොලිස් හැඳුනුම්පතක් හෝ දේශපාලන සබඳතාවක් භාවිතා කළේද යන්න සොයා බැලීමක් ද ඉදිරියේදී සිදු කරනු ඇත.
දකුණු පළාතේ මිද්දෙණිය, වලස්මුල්ල වැනි ප්රදේශවල ක්රියාත්මක වන අපරාධ ජාලයන්ට ඇතැම් පොලිස් නිලධාරීන්ගේ සහාය ලැබී ඇති බවටද තොරතුරු හෙළිවී ඇත. මේ හේතුවෙන් අල්ලස්, සාක්ෂි විනාශ කිරීම වැනි කටයුතු සම්බන්ධයෙන් පොලිස් නිලධාරීන්ට එරෙහිව නීතිය ක්රියාත්මක වීමට ඉඩ ඇතැයි විමර්ශන අංශ පවසයි.
විමර්ශකයන්ගේ ප්රධාන සැකය වන්නේ වසීම් තාජුඩීන් ඝාතනය වැනි සිදුවීම්වලට අදාළව ප්රබල සාක්ෂිකරුවෙකු විය හැකි කජ්ජාව නිහඬ කිරීම මෙහි ප්රධාන අරමුණ විය හැකි බවයි.