දේශීය පුවත්
නල්ලතන්නිය ලක්ෂපාන තේ කර්මාන්තශාලාවක ගින්නක්
මස්කෙළිය වැවිලි සමාගම යටතේ පාලනය වන නල්ලතන්නිය ලක්ෂපාන වතුයායේ තේ කර්මාන්තශාලාවේ තේ කුඩු නිෂ්පාදන අංශයේ අද (09) අලුයම 1ට පමණ ගින්නක් හටගෙන තිබේ.
තේ කුඩු නිෂ්පාදන අංශයේ ආරම්භ වූ ගින්න, තේ කොළ ගබඩා කර තිබූ ගබඩා කාමරය වෙත පැතිර ගොස් ඇති අතර, එමඟින් ඇසුරුම් කරන ලද නිම කළ තේ කුඩුද විශාල වශයෙන් විනාශ වී ඇති බව වතු මූලස්ථානයේ අධිකාරිය පවසයි.
ගින්න තවදුරටත් පැතිර යාම වැළැක්වීමට, වතු කම්කරුවන් කටයුතු කර තිබෙන අතර ඔවුන්ගේ උත්සාහය මගින් ගින්න සීමා කිරීමට හැකි වී ඇත.
කෙසේවෙතත්, වතු කම්කරුවන් පවසන්නේ, මෙම ගින්න වතු පාලනාධිකාරිය විසින් සැලසුම් කරමින් ඇති කර තිබිය හැකි බවට සැකයක් පවතින බවයි.
ගින්නෙන් සිදු වූ මුළු අලාභය මෙතෙක් තක්සේරු කර නොමැති අතර, කිසිවෙකුට අනතුරක් සිදු වී නැත.
තේ කර්මාන්තශාලාවේ ගින්න හේතුවෙන් විදුලිය තාවකාලිකව විසන්ධි කර ඇති අතර, ගින්නට හේතුව මෙතෙක් අනාවරණය වී නැත.
නල්ලතන්නිය පොලීසිය මෙම සිදුවීම සම්බන්ධයෙන් වැඩිදුර පරීක්ෂණ පවත්වයි.