දේශීය පුවත්
බැංකු ගිණුම් විවෘත කරන්න TIN අංකය අනිවාර්ය කෙරේ
2017 අංක 24 දරන දේශීය ආදායම් පනත සංශෝධනය කිරීමට කැබිනට් අනුමැතිය හිමි වී තිබේ.
2025 අප්රේල් 01 වන දා සිට ක්රියාත්මක වන පරිදි රඳවා ගැනීමේ බදු අනුපාතය 5% සිට 10% දක්වා ඉහළ නැංවීම පිණිස වන නීතිමය ප්රතිපාදන 2025 අංක 2 දරන දේශීය ආදායම් (සංශෝධන) පනත මගින් හඳුන්වා දී ඇත.
රජය සඳහන් කළේ, බදු අය කරනු ලබන වාර්ෂික ආදායම් සීමාව වන රුපියල් මිලියන 1.8ක ප්රමාණය නොඉක්මවන ආදායමක් සහිත පුද්ගලයන්ගෙන් ද රඳවා ගැනීමේ බදු අය කර ගැනීමට කටයුතු කිරීම හේතුවෙන්, එවැනි තැන්පත්කරුවන් සහ අඩු ආදායම්ලාභී පුද්ගලයන් අපහසුතාවට ලක් වන බව නිරීක්ෂණය වී ඇති බව ය.
එකී ගැටලුව සඳහා විසඳුමක් ලෙස බදු නිදහස් සීමාවට වඩා පහළ මට්ටමක ආදායම් සහිත පුද්ගලයන්ට ස්වයං ප්රකාශ්යයක් ඉදිරිපත් කිරීමේ ක්රමවේදයක් හඳුන්වා දීමට යෝජනා කර තිබේ.
ඒ අනුව, පොළිය මත රඳවා ගැනීමේ බද්ද අය කිරීමෙන් නිදහස් කිරීම සඳහා වසරකට රුපියල් මිලියන 1.8ක් නොඉක්මවන තක්සේරු ආදායමක් සහිත සියලු නේවාසික තැන්තපත්කරුවන් සඳහා ස්වයං ප්රකාශනයක් හඳුන්වා දීමට සහ සියලු ම වර්ගයේ බැංකු ගිණුම් විවෘත කිරීම සඳහා බදු හඳුනා ගැනීමේ අංකය (ITN) ඉදිරිපත් කිරීම අනිවාර්ය කිරීමට යෝග්ය සංශෝධන ඇතුළත් කරමින් 2017 අංක 24 දරන දේශීය ආදායම් පනක සංශෝධනය කිරීමට අමාත්ය මණ්ඩල අනුමැතිය ලැබී තිබේ.
මුදල්, ක්රම සම්පාදන සහ ආර්ථික සංවර්ධන අමාත්ය වශයෙන් ජනාධිපති අනුර කුමාර දිසානායක ඉදිරිපත් කළ යෝජනාව අමාත්ය මණ්ඩලය විසින් අනුමත කරන ලදී.