විදෙස් පුවත්
ලෝක වෙළෙඳපොළේ රන් මිළ ඉහළ යාම සමඟ ඉන්දියාවේ රන් ජාවාරමේ තත්ත්වය
ලෝකයේ දෙවන විශාලතම රන් ගනුදෙනුකරු වන ඉන්දියාව, රන් ආනයන බද්ද 15% සිට 6% දක්වා අඩු කිරීමත් සමඟ, නීතිවිරෝධී ලෙස රන් රැගෙන ඒම අඩු වී තිබේ. එහෙත්, ලෝක වෙළෙඳපොළේ රන් මිල ඉහළයාම සහ සීමිත සැපයුම හේතුවෙන්, ඉන්දියාවේ රන් ජාවාරම් නැවත ඉහළයාමක් පෙන්වා තිබේ. විශේෂයෙන් ධන්තෙරා සහ දීපවාලී යන හින්දු උත්සව සමයේ රන් මිලදී ගැනීම ශුභකාර්යයක් ලෙස විශ්වාස කිරීම නිසා ජාවාරම් ඉහළගොස් ඇති බව ඉන්දීය රේගු දෙපාර්තමේන්තුව පවසයි.
චෙන්නායි නුවර රන් වෙළෙන්දෙකු සඳහන් කළේ, ජාවාරම්කරුවන් පැය කිහිපයකින් තම ගනුදෙනු සම්පූර්ණ කරන බවයි. ලෝක වෙළෙඳපොළේ රන් මිල ඉහළයාමත් සමඟ, ග්‍රෑම් 10ක රන් මිල රුපියල් 128,395 දක්වා නව වාර්තාගත මට්ටමට ඉහළගොස් ඇත. මෙය 2024 වසරට සාපේක්ෂව 67%ක ඉහළයාමක් ලෙස සටහන් වේ.
නීතිවිරෝධී ලෙස රන් රැගෙන එන ජාවාරම්කරුවන්, බද්ද වැළකීමෙන් රුපියල් මිලියන 1.15ක පමණ ලාභයක් ලබාගෙන ඇත. නමුත් ඉන්දීය රජය ආනයන බද්ද අඩු කිරීමත් සමඟ ජාවාරම්කරුවන්ගේ ලාභය අඩු වී ඇත. වෙළඳපොළේ සැපයුම පහළ මට්ටමක පවතින බැවින්, ඉන්දීය බැංකු රන් තොග සඳහා ඉහළ මිලක් අයකරයි.
2024/2025 මූල්‍ය වර්ෂය තුළ, නීතිමය බලධාරීන් විසින් නීතිවිරෝධී රන් රැගෙන ඒමේ සිද්ධීන් 3005ක් වාර්තා කර ඇති අතර, රජයේ භාරයටගත් රන් ප්‍රමාණය මෙට්‍රික් ටොන් 2.6ක් පමණ බව සඳහන් වේ.